Edlą́ghę dene daghelʔa bek´ólyą ? Nets´édiį́ hąt´e sį.

T´ą dene noghełnį sí danįł´ʔa dé noghełnį hąt´e híle sį. Bet´á nenį́ neljer híto netth´i neljer híto, nághį́ltłi híto, ʔedédorįlnį híto, ʔasíe nets´į hų́le híle hok´ízį́ neghąyałti dé dene daghįłʔa dené hąt´e sį. Kú eją neba detł´ï¿½´ís sį t´ąt´ú dene deghalʔa sí:

• nukár híto, nult´us híto, nek´ázé darílchu híto, nut´eth ʔú dzénedaí ʔú, nedánáts´edher híto nets´į ech´ere haze dadátheʔa dé danelʔa hąt´e sį
  
  
• yo yízį tth´i yo yuwé ʔesdołtsi dé
  
  
• bet´a nats´elzé hoyuwé bech´ónejer hot´á nenį dene herít´į dé
  
  
• łeghą́ręstthi ha hénį dé
  
  
• eya haníle hok´enátther híto, neskene híto, nets´énį kwi híto, nélot´įne híto, nets´į ech´ere haze hots´én bedzié nezǫ hįle dé
  
  
• hosłįne chu edlelé habazį́ hok´étł´á hok´enǫ́dher nenedhen dé, nen horįlʔį híle dé kúlí
  
  
• ʔasie lánets´edi híle ʔú, nenadózet´á, kútth´i nets´én ts´ízíl dé
  
  
• t´a tsąba nełtsi tth´i bets´én kųldher híle haníldhen dé
  
  
• ʔasíe duwé dékut´a nets´én ʔú, neskene hots´én nóręle
  
  
• beba ʔasíe súgha nełti húle
  
  
• hok´étł´á nenį́ eghálaghįna
  
  
• t´ahúk´e hots´én ną́gha ʔú, t´a ʔasíe nełts´i ʔú t´at´i yú bet´órįłʔá dą́lį hoghą yałti dé
  
  
• t´ą dene bél yanełti dą́lį́ yeghą koldher
  
  
• Dene nįzį horį́ją hanį́łtthen
  
  
• sech´a negha haduwé hąt´e sį nét´s´édi dé
  
  

Tsékwi—t´ąnélt´e beghaíyé losí, t´ąt´i dene hęlį losí, beyatié ʔełk´éch´a dé kúlí, t´sąba łąbets´į dené dé kúlí, ʔestonét´įne dené dé kúlí, háyorįla ʔú deschę ʔú t´ahúk´e nádé nįlosí, kú tth´i ts´ékwi beyaze chątheda dé kúlí dadághelʔa hąt´e. Denyu ʔú tthąłts´ei haze ʔú sekwaze ʔú, ʔąłnedhe haze ʔú, ʔąłnedhe ʔú horelyų beghąnohótą hots´én dadáneta dé dáráłʔa hąt´ e sį. Dene ʔasíe k´ódórelyą, la dené, dene ʔasíe hodórelts´i ha bórenį híle, yati hoghądánįdhen dené, eritł´ís kóę nádé dené, dene ts´énį, Dene hélot´įne, dene gá háyorįla nádé dené, dene hanį́del, ʔąła nárádé, ʔałę́łdel, ʔąłaharát´į, deneyu ʔełghąnánedé, ts´ékwi ʔełghąnánedé, t´ą losí dáráłʔaį́ hąt´e sį. Kúlí įłą́ghę kúlí daráłʔa ha hoʔą híle sį.

Nen nųłt´e híle sy danelʔa dékúlí. Kúlí t´ą dene danįłʔa nisí nen tthene ʔeładųne hanele haduwé sį. ʔedįne hharé benį́ naréʔą dézą sį. Kúlí nets´édi ha jorįké ʔį́ hąt´te sį. Dene łą nets´ény walí sí nadé hąt´e sį, dene ts´enį híto, naídíe k´ólyą dené hito, eya hok´élnį dené híto, eritł´ís kóę sekwi hél dayałti dené dąlį́ nadé sį nets´én danį́ hoba. Eyi hot´á t´ahúk´e dene darálʔa bets´édi hok´é hoʔą hots´én yaghųłti. Beyághe yati hot´s´į hultá eyi dene ha theʔą hát´ e sį, SaskTel/DirectWest bets´į eritł´ís beyé.

Dųhhų́ nį hoʔą nohegá dene daráłʔa haduwé sį, bełąghę halye hoʔą sį. Dene beghą náyati nut´á t´at´ú bets´édi walí nįsí hobazį. Eyer dé ʔedįnį hharé benį́ dałtsi ha. Dene t´ą daghelʔa sí, beba horená hél tth´i honejer ląt´e sį dene hél holnį dé. Eją nį́hok´e tthene dághída hąt´e híle sį. Dene t´ą diri la bazį́ eghádálana sí eyi dene hha nárełya hąt´e sį. Eyi hot´á įłą́ghę hot´a dene daghelʔa hot´á danet´a nįdhen dé, bél yaghįłti ʔú tth´i borųłtth´ą́. Įłą́ghe ta dene t´ą t´órįltther walí nįdhen sí beba bél yaghųłti, naídíe k´ólyą dené hito, eya hok´élnį dené híto, eritł´ís kóę sekwi hél dayałti dené híto dene náłtsi dené. Hot Peach húlye diri tsątsą́né bet´á eritł´ís holé bek´e t´ąt´ú Dene bets´édí walí sí beghą dene hoghą náyati nų́ʔá. SaskTel/DirectWest tth´i bet´s´į eritł´ís beyé beghághe yati ts´į hultá theʔą sydene hoba.

Kú nen dene daghįłʔa dé, nen tth´i nets´édiį́ hąt´e sį.
Beyághe yati eritł´ízé yé híto tsą́tsą́né beyé honį
néręlya beyé honį bekánųtá..